ಅರಳಿದ ಹೂವುಗಳು ಮೂಡಿದ ರೇಖೆಗಳು

ಚಿಣ್ಣರಿಗೆ ಚಿತ್ರ ಸಹಿತ ಕನ್ನಡ ಪದಗುಚ್ಛಗಳನ್ನು ‘ತನುಶ್ರೀ ಎಸ್ ಎನ್’ ತಮ್ಮ ತಾಣದಲ್ಲಿ ಹೊರತಂದಿದ್ದಾರೆ.

tanushree

ಈ ಚಿತ್ರಗಳು ಮತ್ತು ಕೆಲವೊಂದು ಸಾಹಿತ್ಯ ಕ್ರಿಯೇಟೀವ್‌ಕಾಮನ್ಸ್‌ ಪರವಾನಗಿ ಅಡಿ ಲಭ್ಯವಿದ್ದು, ಇತರರೊಡನೆ ಹಂಚಿಕೊಳ್ಳಲೂ ಬಹುದು.

Read More

ಸಂತಮ್ಮಣ್ಣ

ಕಲ್ಯಾಣ ಸೇವೆ ಜೇಬಿನ ಬುಡದಲಿ
ಪುಟ್ಟಾಣಿ ಪುರಿಯು ಮೇಲೊಂದಿಷ್ಟು
ಗೋಲಿಬಳಪ ಮತ್ತೊಂದಿಷ್ಟು
ಬಂದ ಬಂದ ಸಂತಮ್ಮಣ್ಣ

ಪಠಾಸು ಪೆಟ್ಲು ಒಳಜೇಬಲ್ಲಿ
ಕಾಸಿನ ಸಾಲು ಕಳ ಜೇಬಲ್ಲಿ
ಚೆಂಡು ದಾಂಡು ಎಡಬಲದಲ್ಲಿ
ಬಂದ ಬಂದ ಸಂತಮ್ಮಣ್ಣ

ಅಮ್ಮನ ಹಾರ ಉಬ್ಬಿದ ಎದೆಗೆ
ಬಿದಿರಿನ ಕೊಳಲು ಗೆಜ್ಜೆಯ ಒಳಗೆ
ಹದ್ದಿನ ರೆಕ್ಕೆ ಎತ್ತಿದ ತಲೆಗೆ
ಬಂದ ಬಂದ ಸಂತಮ್ಮಣ್ಣ

ಕಸ್ತೂರಿ ಚಂದ್ರ ಹಣೆಯಲ್ಲಿಹುದು
ಸಂಜೆಯ ಶುಕ್ರ ಕಣ್ಣಲ್ಲಿಹುದು
ಬೆಳು ಬೆಳ್ದಿಂಗಳು ಗಲ್ಲದ ಮೇಲೆ
ಬಂದ ಬಂದ ಸಂತಮ್ಮಣ್ಣ

ಮೊದಲನೆ ಮಾತು ಹೂವಿನ ಮುತ್ತು
ಮರುಮಾತಾಡಲು ಸಿಡಿಲು ಗುಡುಗು
ಮೂರನೆ ಬಾರಿಗೆ ಆನೆಯ ಕಲ್ಮಳೆ
ಬಂದ ಬಂದ ಸಂತಮ್ಮಣ್ಣ

ಬಾರೋ, ಬಾರೋ, ಸಿಡಿಲಿನ ಮರಿಯೆ
ಬಾರೋ, ನಾಡಿನ ಸುಂಟರಗಾಳಿ!
ತೋರೋ ಸಿರಿಮೊಗ, ತುಂಟರ ಗುರುವೇ
ಬಂದ ಬಂದ ಸಂತಮ್ಮಣ್ಣ

-ಹೊಯ್ಸಳ (ಆರಗ ಲಕ್ಷ್ಮಣರಾಯ)

ಸಂಗ್ರಹ: ಶ್ರೀನಿಧಿ ಎನ್, ಬೆಂಗಳೂರು

Read More

ಬಣ್ಣದ ಜೊತೆಗಿನ ಬೇಸಿಗೆ ರಜೆ

 

ನೀವೂ ಬೇಸಿಗೆಯಲ್ಲಿ ಚಿತ್ರ ಬಿಡಿಸಿದ್ರಾ? ಕಿಂದರಜೋಗಿ ಮೂಲಕ ನಿಮ್ಮ ಗೆಳೆಯರಿಗೂ ತೋರಿಸಿ….

Read More

ಕೇಳಿದ್ದು ಸುಳ್ಳಾಗಬಹುದೂ

ಕೇಳಿದ್ದು ಸುಳ್ಳಾಗಬಹುದೂ ನೋಡಿದ್ದು ಸುಳ್ಳಾಗಬಹುದು
ನಿಧಾನಿಸೀ ಯೋಚಿಸಿದಾಗ ನಿಜವು ತಿಳಿವುದೂ

ಆ……ಆ…..ಆ….ಆ…..

ದೂರದೊಲ್ಲೊಂದೂ ಕಾಡಿತ್ತು ಕಾಡಲ್ಲಿ ಒಂದೂ ಮನೆಯಿತ್ತು
ಮುಂಗುಸಿಯೊಂದೂ ಅಲ್ಲಿತ್ತು ಮನೆಯನು ಕಾವಲು ಕಾಯ್ತಿತ್ತು
ಆ ಮನೆಯೊಡತಿ ಗಂಗಮ್ಮ ತೊಟ್ಟಿಲಲವಳಾ ಕಂದಮ್ಮಾ
ಮುಂಗುಸಿಯಲ್ಲದೆ ಬೇರೇನೂ ಮಗುವಿನ ಆಟಕೆ ಇಲ್ಲಮ್ಮಾ
ಮುಂಗುಸಿಯೊಡನೇ ಸ್ನೇಹದಲೀ ಕಂದನ ಜೊತೆಗೇ ಪ್ರೇಮದಲೀ
ಬಾಳುತಲಿದ್ದಳು ಗಂಗಮ್ಮಾ ಮುಂದೇನಾಯಿತು ಕೇಳಮ್ಮಾ…

ಮನೆಯಲಿ ನೀರೂ ಮುಗಿದಿರಲೂ ಹೊಳೆಯಾ ಕಡೆಗೇ ಹೊರಟಿರಲೂ
ಕಂದನು ಇನ್ನೂ ಮಲಗಿರಲೂ ಮುಂಗುಸಿಯನ್ನೂ ಕೂಗಿದಳೂ
ಮನೆಯಲಿ ಬೇರೇ ಯಾರಿಲ್ಲಾ ಮಗುವಿಗೇ ಯಾರೂ ಜೊತೆಯಿಲ್ಲಾ
ತೊಟ್ಟಿಲ ಬಳಿಯೇ ಕಾವಲಿರೂ ಹೊರಗಡೆ ಎಲ್ಲೂ ಹೋಗದಿರೂ

ಗಂಗೆಯು ಹೊಳೆಗೇ ಹೊರಟಾಗಾ ಬೇಲಿಯಲಿದ್ದಾ ಕರಿನಾಗಾ
ಸರಸರ ಹರಿಯಿತು ರಭಸದಲೀ ಮನೆಯನು ಸೇರಿತು ನಿಮಿಷದಲೀ
ಮುಂಗುಸಿ ನೋಡಿತು ಹಾವನ್ನೂ ತೊಟ್ಟಿಲ ಬಳಿಗೇ ಬರುವುದನೂ
ಮೇಲೇ ಬಿದ್ದಿತು ವೇಗದಲೀ ಕಾಳಗ ನಡೆಯಿತು ರೋಷದಲೀ
ಸೋತಿತು ಹಾವೂ ಜಗಳದಲೀ ಮುಂಗುಸಿ ಗೆಲುವಿನ ಹರುಷದಲೀ
ಹಾವಿನ ಪ್ರಾಣವ ಹೀರಿತ್ತು ಬಾಯಲಿ ರಕ್ತವು ಜಿನುಗಿತ್ತು

ಗಂಗೆಯು ನೀರನು ತರುತಿರಲೂ ಕೈಬಳೆ ನಾದವು ಕೇಳಿಸಲೂ
ಮುಂಗುಸಿ ಬಾಗಿಲ ಬಳಿಬರಲು ಬಾಯಲು ರಕ್ತದ ಕಲೆಯಿರಲೂ

ಬೆಚ್ಚುತ ಗಂಗೆಯು ನೋಡಿದಳೂ ಮಗುವನು ಕೊಂದಿದೆ ಇದು ಎಂದೂ
ಮುಂಗುಸಿಯನ್ನೂ ಚಚ್ಚಿದಳೂ ಅಳುತಾ ಒಳಗೇ ಓಡಿದಳೂ

ತೊಟ್ಟಲ ಕಂದನು ನಗುತಿತ್ತು ನೆಲದಲಿ ಹಾವೂ ಸತ್ತಿತ್ತೂ
ದುಡುಕಿನ ಬುದ್ದಿಗೆ ಬಲಿಯಾಗೀ ಮುಂಗುಸಿ ಕಥೆಯೂ ಮುಗಿದೆತ್ತೂ…

ಕೇಳಿದ್ದೂ ಸುಳ್ಳಾಗಬಹುದೂ ನೋಡಿದ್ದೂ ಸುಳ್ಳಾಗಬಹುದೂ
ನಿಧಾನಿಸೀ ಯೋಚಿಸಿದಾಗಾ ನಿಜವು ತಿಳಿವುದೂ…..

ಚಿತ್ರ : ರಾಮ ಲಕ್ಷ್ಮಣ (1980)

ಸಾಹಿತ್ಯ : ಚಿ.ಉದಯಶಂಕರ್
ಸಂಗೀತ : ರಾಜನ್-ನಾಗೇಂದ್ರ
ಗಾಯನ : ಎಸ್.ಜಾನಕಿ

Read More

ನಾಗರ ಹಾವೆ..

ನಾಗರ ಹಾವೆ ಹಾವೊಳು ಹೂವೆ
ಬಾಗಿಲ ಬಿಲದಲಿ ನಿನ್ನಯ ಕಾವೆ

ಕೈಗಳ ಮುಗಿವೆ ಹಾಲನ್ನೀವೆ
ಬಾ ಬಾ ಬಾ ಬಾ ಬಾ ಬಾ

ಹಳದಿಯ ಹೆಡೆಯನು ಬಿಚ್ಚೊ ಬೇಗ
ಹೊಳಹಿನ ಹೊಂದಲೆ ತೂಗೊ ನಾಗ

ಕೊಳಲನ್ ಊದುವೆ ಲಾಲಿಸು ರಾಗ
ನೀ ನೀ ನೀ ನೀ ನೀ ನೀ

ಎಲೆ ನಾಗಣ್ಣ ಹೇಳೆಲೊ ನಿನ್ನ
ತಲೆಯಲಿ ರನ್ನವಿಹ ನಿಜವನ್ನ

ಬಲು ಬಡವಗೆ ಕೊಪ್ಪರಿಗೆ ಚಿನ್ನ
ತಾ ತಾ ತಾ ತಾ ತಾ ತಾ

ಬರಿ ಮೈ ತಣ್ಣಗೆ ಮನದಲಿ ಬಿಸಿ ಹಗೆ
ಎರಡೆಳೆ ನಾಲಗೆ ಇದ್ದರು ಸುಮ್ಮಗೆ

ಎರಗುವೆ ನಿನಗೆ ಈಗಲೆ ಹೊರಗೆ
ಪೋ ಪೋ ಪೋ ಪೋ ಪೋ ಪೋ

ಪಂಜೆ ಮಂಗೇಶರಾಯ

Read More

ಕೈ ಕೈ ಎಲ್ಲೋದ್ವು?

ಕೈ ಕೈ ಎಲ್ಲೋದ್ವು?
ಕದದ ಮೂಲೆಗ ಹೋದ್ವು
ಕದ ಏನ್ ಕೊಡ್ತು?
ಚಕ್ಕಿ ಕೊಡ್ತು
ಚಕ್ಕಿ ಏನ್ ಮಾಡ್ದಿ?
ಒಲಿಗೆ ಹಾಕಿದೆ
ಒಲಿ ಏನ್ ಕೊಡ್ತು?
ಬೂದಿ ಕೊಡ್ತು
ಬೂದಿ ಏನ್ ಮಾಡಿದಿ?
ತಿಪ್ಪಿಗೆ ಹಾಕಿದೆ
ತಿಪ್ಪಿ ಏನ್ ಕೊಡ್ತು?
ಗೊಬ್ಬರ ಕೊಡ್ತು
ಗೊಬ್ಬರ ಏನ್ ಮಾಡ್ದಿ?
ಹೊಲಕ್ ಹಾಕಿದೆ
ಹೊಲ ಏನ್ ಕೊಡ್ತು?
ಜೋಳ ಕೊಡ್ತು
ಜೋಳ ಏನ್ ಮಾಡ್ದಿ?
ಕುಂಬಾರಗ ಕೊಟ್ಟೆ
ಕುಂಬಾರ ಏನ್ ಕೊಟ್ಟ?
ಮಡಿಕಿ ಕೊಟ್ಟ
ಮಡಕಿ ಏನ್ ಮಾಡಿದಿ?
ಗಿಡಕ್ಕ ನೀರು ಹಾಕಿದೆ
ಗಿಡ ಎನು ಕೊಡ್ತು?
ಹೂವು ಕೊಡ್ತು
ಹೂವು ಏನು ಮಾಡಿದಿ?
ದೇವರಿಗೆ ಮುಡಿಸಿದೆ
ದೇವರು ಏನು ಕೊಟ್ಟ?
ವಿದ್ಯಾ ಬುದ್ದಿ ಕೊಟ್ಟ…

ನೆನಪಿಸಿದವರು – ಶ್ರೀ ಹರ್ಷ ಸಾಲಿಮಠ್

Read More